काठमाडौं– ललितपुर शंखमूलको आवासक्षेत्रमै विद्युतीय शवदाह बनाउन लागिएकोमा ललितपुरका स्थानीयबासी संघर्षमा उत्रिएका छन् । विरोधको क्रममा स्थानीयले सोमबार (चैत ३ गते) ललितपुर महानगरपालिका ११ नं. वडा कार्यालय घेराउ गरी नाराबाजी गरेका थिए । वागमती फाँटमा जग्गा एकीकरण आयोजनाअन्तर्गत कित्ता नम्बर १०५७ मा पर्ने एक रोपनी तीन आना जग्गामा शवदाह गृह बनाइन लागेको हो । स्थानीयसँग सरसल्लाह नगरी आवास क्षेत्रभित्र शवदाह बनाउन लागिएको भन्दै विरोधमा उत्रिएको मणिडोल टोल सुधार समितिका अध्यक्ष राजेन्द्र तण्डुकारले बताएका छन् । सो स्थानमा तत्कालीन उपत्यका नगर विकास प्राधिकरणबाट आवास क्षेत्र बनाउने योजना थियो । अहिले बाक्लो बस्ती भइसकेकोले शवदाह बनाउन नहुने स्थानीयको माग छ । शवदाह गृह बनेको खण्डमा वातावरणीय प्रभाव पर्ने अध्यक्ष तण्डुकारले बताएका छन् । यसअघि शवदाह गृहको विरोधमा स्थानीयले माघ २५ गते जिल्ला प्रशासन कार्यालयमा ज्ञापनपत्रसमेत बुझाइसकेको थियो । “शवदाह गृहको लागि लिन खोजिएको जग्गाको क्षेत्रफल पनि पर्याप्त छैन,” स्थानीयवासी विपिन महर्जनले भन्छन्, “अन्तिम संस्कारको अन्त्येष्टी, श्रद्धाञ्जलि, कपाल मुन्दन, शववाहन, किरियापुत्री आदिको लागि कम्तीमा १० रोपनी जग्गा चाहिन्छ । एक रोपनी जग्गामा शवदाह गृह कसरी बन्छ ?” शवदाह गृह बनेपछि परम्परागत मसानघाट र यससँग सम्बन्धित संस्कार पनि लोप हुने स्थानीयबासी बताउँछन् । नगर विकासले बस्ती बसाउने योजना ल्याएको ठाउँलाई शवदाह गृह बनाएर मसानघाटमा परिणत गराउन नदिने अडान स्थानीयबासीको छ । विद्युतीय शवदाह गृह सुरुमा राम्ररी चले पनि बिस्तारै यसले बस्तीको वातावरण दूषित बनाउने स्थानीयको भनाइ छ । ११ वडाका वडाध्यक्ष इन्द्रमान महर्जनले शवदाहका लागि वडाबाट सिफारिस नभएकोले आफूलाई यसबारे थाहा नभएको बताएका छन् । महानगरको बोर्ड बैठकले गत साउन २३ मा शवदाह गृह बनाउने निर्णय गरेको थियो । महानगरपालिका मेयर चिरीबाबु महर्जनले विद्युतीय प्रविधिको शहदाहमा खुला दाहसंस्कारजस्तो प्रदूषण नहुने भएकाले स्थानीयलाई चिन्तित नहुन आग्रह गरेका थिए । Categorized in उपत्यका