काठमाडौं – कोरोना संक्रमणको जोखिम नियन्त्रणको लागि गत भदौ ३ देखि जारी निषेधाज्ञा खुकुलो गरेसँगै स्थानीय प्रशासनले अब उपत्यकामा बारअनुसार पसल खोल्न पाइने तथा ठेलागाडाको व्यापार पनि खुलाएको छ । जिल्ला प्रशासन कार्यालय काठमाडौंले जारी गरेको सूचना अनुसार सपिङमल, फेन्सी स्टोर, कपडा पसल, जुत्ता पसल, कस्मेटिक लगायतका पसलहरु साताको सोमबार, बुधबार र शनिबार मात्र खोल्न पाइने जिल्ला प्रशासन कार्यालय काठमाडौंले जानकारी दिएको छ । यसैगरी भाँडा र भान्साजन्य साथै सोही प्रकृतिका अन्य पसलहरु साताको आइतबार, मंगलबार र शुक्रबार मात्र खोल्न पाइने छ । यसैगरी फर्निचर र अटोमोबाइल सम्बन्धी पसल साताको सोमबार र बुधबार मात्र खोल्न पाइने छ । स्वास्थ्य सम्बन्धी मापदण्ड अपनाउँदै यसअघि निषेध गरिएका व्यापार व्यवसाय गर्न पाउने भएको छ । यसैगरी, निषेधाज्ञासम्बन्धी नयाँ आदेशअनुसार फुटपाथ पसल र ठेलाको व्यापार विहान ११ बजेसम्म र बेलुकी ४ देखि ७ बजेसम्म खोल्न सकिनेछ । यसअघि साउन २७ गते मन्त्रिपरिषद्को बैठकले नै ठेला र फुटपाथको व्यापार बन्द गर्ने निर्णय गरेको थियो । भदौ ३१ गतेसम्मको लागि अहिलेको खुकुलो निषेधाज्ञा जारी रहने काठमाडौं, भक्तपुर र ललितपुरका प्रमुख जिल्ला अधिकारीहरुले जारी सुचनामा उल्लेख छ । Categorized in उपत्यका