वरिष्ठ साहित्यकार डा.योगेन्द्र प्रधानया मूपाहांसुइ जरीमैंया सिरपा व कुमार साखः सिरपा  ख्वपया सिद्धिपुखु पार्टी प्यालेसय् लःल्हाःगु दु । 

थुगु सिरपा लःल्हाना ज्याभ्वःया मूपाहां डा.योगे्रन्द्र प्रधानपाखें जरीमैंया सिरपा सह प्रा. प्रेमहिरा तुलाधरयात व कुमार साखः सिरपा डा. नेपालभाषा केन्द्रीय विभागया नायः राजन लाल जोशीयात लःल्हानादीगु खः । मयजु तुलाधर थुगुसिया न्हूदँ समारोह समितिया नायःनं खः ।

नेपाल साहित्य मन्दिरया ग्वसालय् जूगु थुगु ज्याझ्वलय् मूपाहां पाखें त्वाः देवाय् मत  च्याका ज्याझ्वःया उलेज्या यानादीगु खःसा ज्याझ्वलय् मन्दिरया दु्जः मनोरमा शर्मा लसकुस न्वचु बियादीगु खः । सिरपा कयादीपिनिगु म्हसीका उत्तम मल्लं बियादीगु उगु ज्याझ्वलय् सिरपा कयादीपिनिगु ल्यज्या व सिरपाया विषयलय् थःगु नुगः खँ ल्यज्या पुचःया डा. चुन्दा बज्राचार्यजुं तयादीगु खः ।  थुगु ज्याझ्वलय् दीपचन्द साखः व निलम साखःपाखें दां दुगु खाम लःल्हायगु ज्या न याःगु खःसा  थुगु मुँज्या मिमला शर्मा न्ह्याकादीगु खः ।  

उगु ज्याझ्वलय् सिरपा कयादीपिं सहप्रा. प्रेमहिरा तुृलाधर व डा. राजनलाल जोशीजुपिन्सं नं थःथःगु नुगः खँ तयादीगु खः ।   सात्यिकार कृष्णलाल प्रधान व हनेबहम्ह तिलक प्रकाश कायष्ठजुं  भिंतुना न्वचु बियादीगु खः । थुगु ज्याझ्वलय् नेपाल साहित्य मन्दिरया नायः माणिक बाबु ग्वंगःपाखें ल्यया कमितिया दुजः डा. चुन्दा बज्राचार्य,   साहित्यकारपिं ध्रुव मधिकर्मि, विमला ताम्राकार व मूपाहां योगेन्द्र प्रधानपिंन्त मतिनाया चिं नं लः ल्हानादीगु खः । 

थुगु ज्याझ्वःया मूपाहां योगेन्द्र प्रधानजुं नं थःगु नुगः खँ तयादीगु खःसा ज्याझ्वःया अन्तय् सभा नायः मन्दिरया नायः माणिक बाबु ग्वंगःपाखें सुभाय् न्वचु बिया सभा क्वचायकादीगु खः । 

ज्याझ्वलय् जरीमैंया साखः व कुमार साखःया किपालय् ज्याझ्वःया  नायो, मुपाहां, दीपचन्द साखः निलम साखःपिन्सं स्वा.स्वांमा देछानादीगु खःसा  ज्याझ्वलय् मन्दिरया दुजः गुहेश्वरी शाक्य लसकुस न्ये हाला न्यंकादीगु खः । 

 

 

 

Categorized in राष्ट्रिय