प्रधानमन्त्री देउवाद्वारा राष्ट्रका नाममा सम्बोधन
Janjati Khabar – Janjati Khabar | २०७८ माघ ७, शुक्रबार
काठमाडौं, माघ ७ - प्रधानमन्त्री शेरबहादुर देउवाले राष्ट्रका नाममा सम्बोधन गरेका- छन् ।
प्रधानमन्त्रीमा नियुक्त भएको ६ महिनापछि पहिलो पटक प्रधानमन्त्री देउवाले राष्ट्रका नाममा सम्बोधन गरेका हुन् । देउवा असार २९ मा पाँचौँपटक प्रधानमन्त्रीमा नियुक्त भएका थिए ।
सम्बाेधनका क्रममा प्रधानमन्त्री शेरबहादुर देउवाले संविधान बमोजिम एक वर्षभित्रै सबै तहको निर्वाचन गर्नुपर्ने दायित्वमा सरकार सचेत रहेको बताएका छन् ।
राष्ट्रको नाममा सम्बोधन गर्दै उनले निर्वाचनको संवैधानिक दायित्वबाट सरकार पछाडि नहट्ने बताए । 'एक वर्षभित्र निर्वाचन गर्नुपर्ने सरकारको दायित्व छ । निर्वाचनको पूर्वतयारीका लागि म अनुरोध गर्दछु,' उनले भने ।
प्रमुख प्रतिपक्षी दलले सरकारले संसद् र स्थानीय तहको निर्वाचन नगर्ने षड्यन्त्र गरिरहेको आरोप लगाइरहेको समयमा प्रधानमन्त्री देउवाले संविधानबमोजिम नै निर्वाचन हुने प्रतिबद्धता व्यक्त गरेका छन् ।
