बढैयातालमा वनबाटिका निर्माण हुने
Janjati Khabar – जनजाति खबर | २०७६ जेठ ८, बुधबार
बर्दियाको बढैयातालमा वनवाटिका निर्माण हुने भएको छ ।
बढैयाताल गाउँपालिकाअन्तर्गत मानझुन्डी सामुदायिक वनको गुलरिया–नेपालगञ्ज हुलाकी सडकको दक्षिणतर्फ रहेका सो तालमा वनबाटिका निर्माण हुने भएको हो ।
शहरी वन तथा नगर वन उद्यान कार्यक्रमअन्र्तगत डिभिजन वन कार्यालय बर्दियाको रु १० लाख, बढैयाताल गाउपालिकाको रु छ लाख र मानझुन्डी सामुदायिक उपभोक्ता समूहको जनसहभागिताबापत रु एक लाख ४० हजार गरी कूल रु १६ लाख ४० हजारको लागतमा सो वनबाटिका पार्क निर्माण हुने भएको हो ।
वनबाटिका निर्माणका लागि बढैयाताल गाउँपालिकाका अध्यक्ष लालबहादुर श्रेष्ठ र प्रमुख प्रशासकीय अधिकृत लालबहादुर योगी, मानझुन्डी सामुदायिक वनका अध्यक्ष शेरबहादुर रावल र डिभिजन वन कार्यालय गुलरियाका डिभिजन वन अधिकृत हरिप्रताप श्रेष्ठबीच त्रिपक्षीय सम्झौता भएको छ ।
बाटिका निर्माणको काम २०७६ असार १५ सम्म सम्पन्न गर्ने सहमति भएको बताइएको छ । करीब १० हेक्टर क्षेत्रफलमा निर्माण हुने वनबाटिकामा बाल उद्यान, फलफूलको बगैँचा र पिकनिकस्थलजस्ता संरचना बनाइने मानझुन्डी सामुदायिक वनका कार्यालय प्रमुख पदमबहादुर बुढामगरले जानकारी दिनुभयो ।
Categorized in राष्ट्रिय
