मलेसियामा दुई रेल ठोक्किँदा दुई सय बढी यात्रु घाइते
Janjati Khabar – Janjati Khabar | २०७८ जेठ ११, मंगलबार
मलेसियाको राजधानीको क्वालालम्पुर नजिकैको भूमिगत रेलमार्गमा दुई रेल ठोक्किँदा २ सय बढी यात्रु घाइते भएका छन्।
अन्तर्राष्ट्रिय सञ्चारमाध्यमहरूका अनुसार मलेसियाको पेट्रोनाज ट्वीन टावर नजिकैको टनेलमा सोमबार राति स्थानीय समयअनुसार पौने ९ बजे एउटा खाली रेल र अर्को यात्रुवाहक रेल ठोक्किएका हुन्।
विपरीत दिशामा गइरहेका दुबै रेल एउटै ट्र्याकमा भएकाले दुर्घटना भएको हो। तीमध्ये खाली रेल मर्मतपछि ल्याइएको थियो। रेल वे ट्राफिकका कर्मचारीहरूले सञ्चार गर्दा फरक परेकाले दुबै रेल एउटै ट्र्याकमा कुदेको हुन सक्ने बताइएको छ।
घाइतेमध्ये ४७ जनाको अवस्था गम्भीर छ भने बाँकी सामान्य छन्। मलेसियाका प्रधानमन्त्री मुहिद्दिन यासिनले दुर्घटनालाई गम्भीर भन्दै विस्तृत छानबिन गर्न निर्देशन दिएका छन्।
यातायात मन्त्री वी का सियोङले उक्त मेट्रो रेलको २३ वर्षे इतिहासमा यो ठूलो दुर्घटना भएको बताएका छन्।
