कीर्तिपुर÷नेपालको पहिचान बोकेको नेवार समुदायको मौलिक बाजा धिमे, बाँसुरी, खिँ, मादल इत्यादी मौलिक बाजाको प्रशिक्षण दिनको लागि कीर्तिपुर १ वडास्थित थांबहाः टोलको थांबहाः दाफा खलःका युवा संगीतकर्मीहरु सिन्धुपाल्चोक जाने भएका छन् । सिन्धुपाल्चोकको नेवार समुदायको बाहुल्यता रहेको बलेफी गाउँपालिका–५ बलेफी बजारका नेवारहरुलाई ती मौलिक बाजाहरुको प्रशिक्षण दिन थांबहाः कीर्तिपुरका युवाहरु सिन्धुपाल्चोक जान लागेका हुन् । बलेफी नेवारी संस्कृति प्रवद्र्धन समिति बलेफी गाउँपालिका–५ सिन्धुपाल्चोकको सक्रियतामा तथा उक्त गाउँपालिकाका अध्यक्ष विकास श्रेष्ठको पहलमा उक्त मौलिक बाजा प्रशिक्षण हुन लागेको जानकारी बलेफी नेवारी संस्कृति प्रवद्र्धन समितिका अध्यक्ष खड्ग राज श्रेष्ठले जानकारी दिनुभएको छ । समितिका अध्यक्ष खड्ग राज श्रेष्ठ भन्नु हुन्छ,“बलेफी बजारमा विभिन्न समुदायका जनसमुदायहरुको बसोबास रहेका छन् भने बाहुल्यता नेवार समुदायको छ । पहिले पहिले धिमे बाजा र अन्य बाजाहरु बजाइन्थ्यो यता । अहिले हराइसकेको छ । हाम्रो वडाध्यक्ष विकास श्रेष्ठको पहलमा र हाम्रो समितिको सक्रियतामा फेरि नेवार समुदायको मौलिक बाजाहरु बाँसुरी, धिमे, खिं, मादल इत्यादी बाजाहरु यहाँ सिकाउने पाईला चालेका हौं । प्रशिक्षकको रुपमा हामीले कीर्तिपुरको थांबहाः दाफा खलःका संगीत गुरुहरुलाई रोजेका छौं ।” प्रशिक्षणको लागि चाहिने बाजाहरुको जोरजाम भइसकेको जानकारी दिंदैं समितिका अध्यक्ष श्रेष्ठले मौलिक नेवारी पोशाकहरु पनि तयार भइसकेको बताउनुभएको छ । अध्यक्ष श्रेष्ठले बलेफी बजार सिन्धुपाल्चोकका बच्चादेखि युवासम्म गाउँकी चेली–बुहारीहरुलाई उक्त बाजाको प्रशिक्षण दिइने जानकारी दिंदै दशैंको आसपासदेखि नेवारी परम्परा अनुसार नासः द्यः अर्थात् नृत्यनाथको पूजाविधिबाट प्रशिक्षण सुरु गर्ने जानकारी पनि दिनुभयो । यस्तै कीर्तिपुर १ वडास्थित थांबहाः दाफा खलःबाट धिमे तथा खिं र मादल बाजामा प्रशिक्षणमा प्रशिक्षकको रुपमा सम्भवतः गुरुको रुपमा राजेन्द्र महर्जन, विजय महर्जन, नरेश महर्जन र अन्य तालबाजा गुरुहरु एवं बाँसुरी प्रशिक्षण गुरुको रुपमा राजेश महर्जन नेवाः र अन्य बाँसुरीका गुरुवर्गहरु बलेफी बजार सिन्धुपाल्चोक जानुहुनेछ । स्मरणीय रहोस्, कीर्तिपुर नगरपालिका १ वडास्थित थांबहाः दाफा खलःले कीर्तिपुरको तुँझ्वः, भरियाँपुखुसी, चिथु विहार, बाघभैरवस्थान, क्वछेँ, सागल, नगाउँमा धिमेबाजा तथा बाँसुरी बाजाको प्रशिक्षण दिइसकेका छन् भने कीर्तिपुर बाहिर गाम्चा, सेतीदेवी, पालुङ्ग, सिरं नैकाप, तापाख्यः, बोसिगां इत्यादी स्थानमा उक्त धिमे, खिं तथा बाँसुरी बाजाको प्रशिक्षण दिइसकेका छन् भने अब सिन्धुपाल्चोकको बलेफी बजारमा प्रशिक्षण दिने क्रममा थांबहाः दाफा खलःको तयारी रहेको छ । Categorized in सिनेमा