काठमाडौं– कीर्तिपुर उद्योग वाणिज्य संघले कीर्तिपुर नगरपालिकालाई राहत वितरणको लागि ५ लाखबराबर खाद्यान्न वितरण गर्ने भएको छ । लकडाउनको समयमा नगरबासीलाई राहत दिन संघले उक्त खाद्यान्न सहयोग गर्न लागेको हो । वैशाख १० गते दिउँसो कीर्तिपुर नगरपालिकाको भवनमा खाद्यान्न हस्तान्तरणको कार्यक्रम रहेको संघका अध्यक्ष राज्यलक्ष्मी शाक्यले जानकारी दिएकी छिन् । चामल, दाल, तेल, नुनजस्ता खाद्यान्न नगरपालिकालाई हस्तान्तरण गरिने जानकारी दिँदै शाक्यले नगरका प्रहरीलाई साबुन र मास्क पनि वितरण गर्न लागिएको बताएकी छिन् । यसैगरी, लकडाउनको समय नगरका असहायक, दीनदुःखी एवं दैनिक ज्याला मजदुरी गर्ने मजदुरवर्गलाई बिहान बेलुका खाना खुवाउन कीर्तिपुर नगर युवा समितिलाई खाद्यान्न हस्तान्तरण पनि गरिने शाक्यले जानकारी दिएकी छिन् । वाणिज्य संघले १३ जनाको तदर्थ समिति गठन गरी राहतको लागि सहयोग गरिने संघका अध्यक्ष शाक्यले बताएकी छिन् । Categorized in उपत्यका