साहित्यकार तथा गीतकार कादम्बरी दाना श्रेष्ठको नवीन साहित्यिक कृति ‘इमा’
Janjati Khabar – विजयरत्न असंबरे | २०८३ जेठ ४, सोमबार
साहित्यकार तथा गीतकार कादम्बरी दाना श्रेष्ठको नवीन साहित्यिक कृति ‘इमा’ राजधानी काठमाडौंमा एक विशेष समारोहबीच लोकार्पण गरिएको छ । आइतबार चलचित्र विकास बोर्ड परिसरमा आयोजित साहित्यिक तथा सांगीतिक वातावरणले भरिएको कार्यक्रममा विभिन्न क्षेत्रका प्रतिष्ठित व्यक्तित्वहरूको उल्लेखनीय उपस्थिति रहेको थियो ।
कार्यक्रममा राष्ट्रियसभा सदस्य डा. अञ्जना शाक्य प्रमुख अतिथिका रूपमा सहभागी हुनुभएको थियो भने कार्यक्रमको सभापतित्व स्वयं लेखिका कादम्बरी दाना श्रेष्ठले गर्नुभएको थियो । त्यसैगरी विशिष्ट अतिथिमा इजरायली राजदुत इस्मुलीक एल्विस र श्रीमती मिरा परेडयारका साथै गीतकार संघ नेपाल का अध्यक्ष वसन्त वित्यासी थापा, संगीतकार संघ नेपाल का उपाध्यक्ष शंकर थापा ‘स्माइल’, गीतकार अम्बिका गुरुङ, गायिकाहरू मिलन नेवा, सरिता शाही, सुवर्णकेशरी महतलगायत सुन्दर योजन तामाङ, सुगन्धा माझी, पेमा डोल्मा डेल्मु, यूवराज लामा, तेजिङ शेर्पा, डिजे विपिन तामाङसहित साहित्य, संगीत र सामाजिक क्षेत्रसँग आबद्ध थुप्रै व्यक्तित्वहरूको गरिमामय उपस्थिति रहेको थियो ।
कार्यक्रममा प्रमुख अतिथि, विशिष्ट अतिथि तथा अन्य अतिथिहरूले संयुक्त रूपमा ‘इमा’ कृतिको लोकार्पण गर्नुभएको थियो । लोकार्पणसँगै हलभरि तालीको गडगडाहट गुन्जिएको थियो भने उपस्थित अतिथिहरूले लेखिकाको सिर्जनात्मक यात्राको खुलेर प्रशंसा गरेका थिए ।
स्वागत मन्तव्य राख्दै पेमा डोल्मा डेल्मुले वैदेशिक रोजगारीको सिलसिलामा इजरायलमा केयर गिभरको रूपमा कार्यरत रहँदै साहित्य सिर्जना गर्नु सामान्य कुरा नभएको उल्लेख गर्नुभयो ।
कार्यक्रममा आफ्नो धारणा राख्दै लेखिका कादम्बरी दाना श्रेष्ठ भावुक बन्नुभएको थियो । उहाँले इजरायलमा रोजगारीका क्रममा आफूले जीवनका अनेक अनुभव, संघर्ष, पीडा र आत्मीयता नजिकबाट महसुस गरेको बताउनुभयो । पुस्तक प्रकाशनमा आफ्नो दाजुको महत्वपूर्ण सहयोग रहेको उल्लेख गर्दै उहाँले नेपालमा जन्म दिने आमासँगै इजरायलमा आफूले धर्म दिने आमाजस्तै ममतामयी व्यक्तित्व पाएको स्मरण गर्नुभयो । उहाँले दिवंगत ती आमाप्रति श्रद्धाञ्जली अर्पण गर्दै उहाँको आत्माको चिरशान्तिको कामनासमेत गर्नुभयो ।
कार्यक्रममा शुभकामना मन्तव्य व्यक्त गर्दै इजरायली राजदूत इस्मुलीक एल्विसले नेपाल र इजरायलबीचको सांस्कृतिक तथा मानवीय सम्बन्धलाई अझ प्रगाढ बनाउन यस्ता साहित्यिक कृतिले महत्वपूर्ण भूमिका खेल्ने बताउनुभयो । उहाँले नेपाली समुदायले इजरायलमा पुर्याएको योगदानको प्रशंसा गर्दै कृतिको सफलताको शुभकामना व्यक्त गर्नुभयो ।
प्रमुख अतिथि डा। अञ्जना शाक्यले कादम्बरी दाना श्रेष्ठलाई ‘भाग्यमानी लेखिका’को संज्ञा दिँदै ‘इमा’ ले आमाप्रतिको भावना, ममता र संवेदनालाई अत्यन्त मार्मिक ढंगले प्रस्तुत गरेको बताउनुभयो ।
कार्यक्रमको अन्त्यमा विशेष अतिथिहरूलाई मायाको चिनो तथा सम्मानपत्र प्रदान गरिएको थियो । साहित्य, संगीत र मानवीय संवेदनाले भरिएको उक्त समारोहले ‘इमा’ कृतिलाई केवल पुस्तक विमोचनमा सीमित नराखी वैदेशिक भूमिमा संघर्षरत नेपालीहरूको भावनात्मक कथाको उत्सवका रूपमा स्थापित गरेको सहभागीहरूको धारणा थियो ।
Categorized in साहित्य-कला
